Ua teena ma ua le talia e le komisi suesue o eleele poo le Land Commission i lana faaiuga na folasia ile aso Tofi o le vaiaso nei, le finauga a nisi o matai ma aiga o le nuu o Saina ile itumalo o Faleata, lea sa latou momoli ai se mau i luma o le komisi e faapea o eleele o le nuu na maua ise fefaataua’iga o fanua ile va o ni tagata mai Tonga e tupuga mai ai tagata o Saina ma tagata Samoa, o fanua umia saoloto poo freehold lands.
O le aofaiga atoa o eleele sa aafia ile finauga e 74 eka, peitai o lea mau sa tetee iai nisi o matai ma aiga o le nuu ma latou finauina o eleele faaleaganuu e pulea e alii ma faipule o le afioaga.
Ua apo ma faatumau e le komisi o fanua o loo faauluulu ile afioga ile Faamasino sili, se iuga na faia e le faamasinoga ile tausaga e 1902 i taimi o pulega a Siamani, na avea ai ia eleele na maua ise fefaatauaiga ma fanua faaleaganuu e faasino i alii ma faipule o le nuu o Saina.
Faaalia ese tama fanau a le afioaga o loo galue nei o se faifeau sa malaga mai Niusila ona o le fia auai ile lauina o le faaiuga, o le tali lea mai le Atua ma o le faaiuga foi lea e maua ai le nonofo filemu o tagata o le nuu.
