O loo tumau pea ona to’atele tagata tafafao i Niu Sila e malaga mai i Samoa e pei ona faailoa e le pulega o tagata tafafao i ana faamaumauga faalauiloa o masina ta’itasi.
O le 11 masina o le tausaga na te’a nei 2025 mai ia Ianuari e oo i le faai’uga o Novema o loo faamauina e tusa ma le 74 afe 835 tagata i Niu Sila na tafafao mai i Samoa, o se siitaga e tusa ma le 47 i le 48 pasene pe a fua i le 11 masina o le tausaga i tua atu, 2024.
I lea lava faamaumauga ua atagia ai o se tulaga manino lea o le siitia i le 19 tesimale 8 pasene o tulisi mai Aotearoa e malaga mai i lo tatou atunuu e tafafao ai ma faaaogā auaunaga eseese o le atina’e o tagata tafafao e pei o faletalimalo ma fale apitaga tu matāfaga ma isi auaunaga.
I se vaaiga mamao o loo iai le talitonuga o le a faaauau ona siitia pea lea tulaga lelei, ina ua taliu mai se malaga faalauiloa o lea atina’e sa afea ai vaega eseese o Niu Sila.
O se malaga sa faalauiloa ai lea atina’e mo le silafia e pisinisi o loo faia faatosina mo le au tafafao ina ia maua ai faamatalaga e silafia ai e tele mata’aga i Samoa e tafafao mai iai.
E to’a 25 lea aumalaga sa latou afea Kalaiesetete, Ueligitone, o Tauranga, ae faai’u atu i Aukilani.
Sa aofia ia i latou na filifilia mo lea aumalaga sui o pisinisi ma auaunaga tau tulisi i Samoa, ma sa ta’ita’i e le faauluuluga o le vaega o Maketi a le pulega o tagata tafafao mai i Samoa.
