Ua faamaonia nei le ave i tua o le tagi o faatosina o le faigapalota a le susuga ia Tupai Avala Savaiinaea, o le sui tauva a le Tautua Samoa lea na faia faasaga i le sui manumalo filifilia a le FAST le sui tamaitai ia Mulipola Anarosa Ale Molioo.
O lenei faaiuga ua faatumauina ai loa le tofi faipule mo Palauli No.1 ia Mulipola e pei ona manumalo ai mai le faigapalota tele I le Aso 9 o Aperila.
Taua e Tupai i fafo o le potu faamasino “E leai lava se isi mea e sili atu ona taua ia maua ma le minisitā, e faataua le nuu, itumalo ma aiga.
O le palota fo’i o le mea faaopoopo i le soifua o le tagata ma le ola, ae o le aiga ma le mafutaga i le nuu, itumalo ma ekalesia o le mea na e faavavau.”
Na ia taua e faataua lava le finagalo o le itumalo ma le nuu ma o lea ua ave iai lana faamuamua.
Faaalia foi e Mulipola Anarosa lona fiafia tele ona ua mafai ona soalaupule le la mataupu i auala faatamalii ma e moni ai le tala e misa lava le tama ma le teine ae o le tuagane ma le tuafafine.
O le iuga o le Palota i le Aso 9 o Aperila mo Palauli No.1 tulai mai ai Mulipola Anarosa i palota e 694.
