O le aso 9 o Oketopa o le tausaga ua mavae na avanoa ai le tofiga o le komesina o le Matagaluega o Leoleo, Falepuipui ma le Toefuataina, ma ua atoa i le masina nei le tausaga o tau’ave e le afioga, Leiataua Samuelu Afamasaga le tofiga sui komesina o loo fa’auluulu iai le Matagaluega i le taimi nei.

Ua mae’a ona faasalalau le avanoa o se komesina ma ua mae’a ai ma faatalanoaga o i latou na tusi talosaga.

Ua fa’ailoa e le palemia o le Minisita o le Matagaluega na filifilia se tagata mai fafo e tau’aveina lea tofiga, peita’i ua talosaga i le Kapeneta e finagalo e filifili se tasi mai le Matagaluega o leoleo na te tau’ave lea tulaga maualuga, ma e faapena foi i se tasi e avea ma Komesina e pulea le auaunaga mo Falepuipui ma le Ola Toefuataina.

O le tatalaina o le tasi o nofoaga fou mo le vaega o ta’avale afi ua iai nei i le uafu i Mulifanua i le faai’uga o le vaiaso na te’a nei, na fa’ailoa ai e le palemia susuga Laaulialemalietoa Leuatea Polataivao Fosi Schmidt o lona fatu atoa le Matagaluega ma o loo naunau e toe fa’afoi iai le talitonuga o le atunu’u i le fa’atinoga o lana tautua, ma ia toe fa’afoi le Matagaluega i le auaunaga sa iai muamua.  

O le nofoaga fou mo le vaega o ta’avale afi i Mulifanua sa fa’atupe i se fesoasoani a le malo o Ausetalia i le tau e silia i le 810,000 tālā ma ua aofia ai ma nisi o meatotino o uilaafi e 12.

Ua faailoa e le ta’ita’i o le malo, i le tatalaina o le galuega i Mulifanua o le masina fou o Novema, o le a feiloai atu i le afioga Toeolesulusulu Anthony Alabanese, le palemia o le malo o Ausetalia.

O le fono a malo o le taupulega sa talimalo ai Samoa i le tausaga e 2024 na faatino ai e le afioaga o Satapuala lana fa’aaloalo maualuga i le ta’ita’i o lea malo o se pā’aga tōtino a Samoa, o le fa’ae’e iai o le suafa matai o le Toeolesulusulu.