Muamua atu i le tulaga ua iai nei le mataupu ia Taiwan ma Saina. Ua faailoa i le asō lē o toe iai le fofoga fetalai o le maota o Amerika Nancy Pelosi i Taiwan ae o ananafi na faamo’i ai e Saina ana faamatalaga sa folafola mai i le vaiaso talu ai i ni tulaga o le a iai Taiwan pe afai ae taunuu le malaga mai o le sui lea o Amerika i lo latou atunuu.
Ua lipotia e le vaega a le militeli a Saina ua faia a latou faata’ita’iga o meatau alualu mamao aemaise o fana i le Taiwan Strait e pei ona iai i le aso ananafi ma lipotia i tala mai le CCTV.
E le’i leva ona toe taliu le malaga a Pelosi mai Taiwan ae vaaia loa le silia ma le 20 o vaalele tau a Saina i le Taiwan Strait le ogatotonu lea i le va o le mainland ma Taiwan. O le tali a Taiwan o loo latou mata’ituina ma le toto’a gaioiga uma ia ma o le a tuuina ane foi sa latou tali e talafeagai ma tulaga e pei ona molimauina.
Ua faailoa foi e Iapani i le 9News o faata’ita’iga ia a Saina ua faamata’u atu ai ma le saogalemu o lona atunuu. O le taimi nei ua tulimata’ia e le to’atele aemaise lava foi i Ausetalia nei le mataupu lea i le atu Asia e pei e foliga o le a alia’e ai se kopi o Lusia ma Ukraine.
