O le masina amata o le tausaga fou 2026 ua faamoemoe o le a faamautū ai le nofoaga o le a avea ma ofisa autū o le sosaiete a faia’oga Samoa le SFS.
Ua faailoa e le ta’ita’i o le malo lea fuafuaga i le mae’a o le feiloa’iga i le vaiaso ua mavae a le afioga i le Palemia ma faia’oga uma o le atunuu ia i latou o tautua i a’oga a le malo, a’oga tuma’oti ma a’oga a ekalesia.
O se feiloa’iga na faailoa ane ai le mana’omia e lea sosaiete o se nofoaga e tapuvae tasi iai a latou galuega mo le faamaopoopoina o faia’oga o loo tautuaina le ola a’oa’oina o alo ma fanau a Samoa.
Ua leva tausaga talu ona faavaeina lea sosaiete ae o lea faato’ā maua se nofoaga e avea ma ona ofisa tutotonu e pei ona talia e le ta’ita’i o le malo le augani a le sosaiete.
