O le tu faafuasei i taofi o le isi taavale sa i luma o le isi, le mafuaaga na ala ai ona tuli mai se vaega o Mt Wellington seia oo i St Lukes i Aukilani, ma iu ai ina faaaoga le laau malosi.
O loo su’e pea nei e leoleo lē na fanaina le taavale lea sa laua tuli i le po o le Aso Lua, mulimuli ai fana ma faamanu’alia ai le tamaitai talavou 15 tausaga.
E tolu pulufana na tafana mai e lē sa i totonu o le Mazda hatchback 2009 lanu efuefu, numera o le laisene NGL15, ma o lea sa ati i le taavale e faapea o le minivan a le aiga sa iai i totonu lē ua faamanualia tigaina.
E toalima lelei i latou sa i totonu o le taavale lea na ati ai pulufana, ma e ese mai le tamaitai talavou ua faamanu’alia, o lea foi sa togafitia se tasi i manu’aga e lei mafua mai ona o pulufana.
E tuufaatasia tala fou e le o mautinoa e leoleo le ituaiga fana sa faaaoga, ma o loo iai foi le talitonuga o le ofisa, e leai se fesootaiga a lenei faalavelave ma faiga a ni kegi.
O le uma ai ona tafana e le Mazda o loo tausailia nei o le minivan, na sola ai ese ae faaauau le minivan agai i le pamu penisini lata ane mo se fesoasoani.
Ua valaau mai ai foi ma leoleo i soo se tasi e silafia nisi faamatalaga e fesootai atu, ma o se taimi o i luma ona faailoa faalauaitele mai lea o le ata o le Mazda o loo tau sailia.
