A o faasolo pea ona tatala ofisa tutotonu o Fono Faavae a itumalo faapalota mo le poloketi o le tasi le miliona tala, ma nisi o itumalo o loo faatino galuega o le fausia oo latou ofisa tutotonu, ua faailoa e le Minisita o Faatoaga ma Faigafaiva o se tasi o sui o le komiti o loo vaaia lea faiga faavae fou a le Malo, e iai le itumalo ua oo atu ia te ia se molimau o se tasi o lona aiga, ua le faaaogaina le 200 afe tala o le tupe faavae mo le fausia o le ofisa tutotonu, ae ua tufa i nuu o le itumalo seleni mai lea vaegatupe.
Ua ave ai le tuualalo a le Minisita i itumalo faapalota uma o le atunuu, ina ia tausisia taiala ua faataoto atu mo le faaaogaina o seleni, ae le o le tufa, ona e leai se taiala faapea o le faiga faavae o le atiina’eina o nuu ma afioaga o itumalo palota e 51.
Se finagalo o le afioga i le Minisita o Faatoaga ma Faigafaiva le susuga Laauli Leuatea Polataivao Fosi Schmidt, i le polokalame o le Soa le Pule a le TV2.
Ua faailoa e le Minisita o loo iai le vaaia o le poloketi tasi le miliona tala le afioga Leota Laki Lamositele Sio, i se faatalanoaga i le tatalaina o le ofisa tutotonu o le Fono Faavae a le itumalo o le Vaimauga Numera 4 talu ai nei, e leai se itumalo ua faamatuu iai le tasi le miliona e ese mai le lua selau afe tala muamua, seiloga ua oo uma atu faamatalaga o le faaaogaina o lea vaegatupe ma ia sosolo i le taiala ua faataoto atu e le Malo.
O le masina o Tesema o loo fuafua e faamatuu ai le miliona i le faamalieina uma o aiaiga o le taiala o le faaaogaina o le 200 afe tala ua faamatuu mo le fausia o ofisa tutotonu, ma faatotoga i masini ma isi vaega manaomia.
