Na tuai tele ona tali mai le pulenuu o Aukilani i le taimi ua matuai tigaina ai le aai.
O le taitai o le National, Christopher Luxon o ia lea o se tasi na faatalosaga faalauaitele i le pulenuu ua tatau ona faia ni fale e sulu iai tagata ua leai ni fale i le po o le Aso Faraile, ma e fesoasoani foi lea i le aufaigaluega o loo feagai ma le laveaiina mai o tagata.
O se tasi o councillor a Aukilani Jo Bartley na ia faapea, e tatau i le pulenuu ona agai online ma vaavaai i le pagatia ua iai Aukilani, ma e le moomia le tau faatali.
O nisi o taitai e lei faatali ae na agai lava latou online ma fai i tagata e aua le faatali pe afai ua le saogalemu, pau o lea ia vave ona agai ese.
Ua faia ai nei se petition poo se talosaga aloaia tusitusia o loo malilie iai nisi o tagata, e aveese le pulenuu o Aukilani o Wayne Brown.
O lenei petition o loo mafua i le lē lelei o pulega a le pulenuu ma le tuai ona faia o sana gaioiga i le taimi o loo tigaina ai tagata Aukilani e pei ona faatoa sau ai lana poloaiga o faalavelave faafuasei poo le declaration of emergency mo Aukilani ae ua tea le itula e 10 i le po o le Aso Faraile ae ua leva ona tafefea taavale, leai ni fale o le toatele ma ua toalua tagata maliliu ae toatasi ua leiloa.
E oo mai i le taimi e tuufaatasia ai tala fou ua 8,000 ma ona tupu saini, ma e 10,000 saini o loo tuli.
O le toatele o loo le fiafia lava ona o le uluai taimi na tulai ai Brown i le Aso Toonai ae soona lafo lava ana faamatalaga e le gata o le sa’i i tagata na faafaigata ona aveesea mai o latou fale ae o le leai o sona lagona alofa i lagona o aiga mafatia ua iai nei.
Ma o saunoaga ia e tali ai fesili na fesiligia ai le lē lelei o le tali mai o la latou pulega.
Mai le councillor o Manukau Alf Filipaina na ia tautino ananafi e moni e fai lava si faatuai ona tali mai o le council i le taimi ua lolovaia ai Aukilani.
A o iai faatasi ai foi i Magele ananafi Filipaina ma le pulenuu o Aukilani, na toe saunoa ai Brown na ono iai faaiuga e lei sao ona fai i le po o le Aso Faraile.
