O loo faatali pea tagata o aiga na aafia i lologa ia latou peimeni mai le Emergency Relief Fund lea na faapea e maua i le Aso Lua.
O le Emergency Relief Fund lenei o le a faasoa ai le $1.5 miliona e pei ona faailoa mai i le vaiaso talu ai, ma ua silia ma le 800 tagata ua faatalosaga agai i le Auckland Council.
Peitai o le Aso Lua lea na sau ai le tala o le a maua ai, ae na ta’ua e le sui o le pulega a le Auckland Council i tala a le leitio a Niu Sila, Anna Bray ona o le aso malolo o le Waitangi sa iai, o le mafuaaga lea ua faatuai ai.
Na saunoa Bray, o le taimi faatulagaina o loo iai e tatau ona na o ni nai aso e va ai le taimi e faaulu ai le talosaga ma le taimi e maua ai le tupe, peitai ua le ausia i le vaiaso nei.
E ese mai i le aso malolo, e iai foi nisi o talosaga e ono umi le taimi e iloilo ai ma o le isi lea mafuaaga o le umi ona faatali.
I le ta’ua ai o fesoasoani mo aiga o Aukilani na aafia lologa, e ese mai le fesoasoani lenei o loo faatalosaga agai i le Auckland Council, ae o loo mafai foi ona faatalosaga i peimeni ua ta’ua o civil defence payment agai i le Work and Income.
