I le 75 o tausaga o lona soifua ma o loo galue ma tautua pea i le malo ma le atunuu i tofiga ua valaauina ai, o le afioga ile faletua Gatoloaifa’ana Tilianamua Afamasaga, o se tamaitai ma se tina o le atunuu ua tū matila lana tautua ile tomai faafaia’oga, ose tasi foi o loo lotolotoi i auaunaga eseese e pei ona tofia ai e le Malo talu ai nei, e avea ma se tasi o Komesina o le Komisi o galuega a le Malo le Public Service Commission.

O le faau’uga a le Iunivesite Aoao a Samoa ile aso Tofi o le vaiaso nei, o le a faatino ai e le Iunivesite a le atunuu se faaaloalo maualuga mo lea tamaitai o Samoa, o le faae’eina lea iai o le faailoga foma’i poo le Honorary Doctorate of Letters. O se faailoga e amanaia ma faafetaia ai le sao o le afioga Gatoloaifa’ana Tilianamua Afamasaga, ile atiina a’e o le ola aoaoina o fanau lalovaoa a Samoa e pei ona sa avea ai ile tausaga e 1992 ma se tasi o faiaoga  ile Kolisi sa aotauina ai alii ma tamaitai o le atunuu sa aooga ile Kolisi Faafaiaoga sa iai a le atunuu i tausaga ua mavae.

O ia le uluai faauluuluga poo le Dean o le vaega mo le aoaoina o le tomai faafaia’oga ile Iunivesite a Samoa ina ua amata faavae lea vaega o aoaoga a le Iunivesite Aoao a le atunuu. Sa avea foi ma Faatonu ile nofoaga o le Oloamanau mo aoaoga faaauau ose tasi o vaega o le Iunivesite. O ia foi ose tasi sa faauluulu iai le faalapotopotoga ua taua ole Samoa Workers Congress lea na amata tautalagia ai le faafitauli o le faafaigaluegaina o fanau poo le child labour.

O le maea o le faigapalota tele a le atunuu ile tausaga e 2016 na filifilia ai Gatoloaifa’ana Tilianamua Afamasaga ma se tasi o sui o le komisi o faigapalota sa suesueina faaletonu ma faafitauli sa tulai mai ile maea o lena faiga filifiliga a le atunuu.