I le tolopo faalua o le lauina o se faasalaga o Malele Atofu Paulo i le moliaga ua faamaonia o le taupulepule e faaoo le maliu i lē sa avea ma Palemia, ua le mafai e Malele ona totogi se loia e tulai mo ia ina ua musu i le loia sa finauina lona moliaga, ma ua manuia lana talosaga mo se loia e totogi e le Malo.
Peitai sa faailoa e lē ua molia i le faamasinoga maualuga ina ua toe valaau le mataupu i le Aso Gafua o le vaiaso nei, e manao e filifili e ia le loia ae totogi e le Malo.
Ae na faailoa iai e le faamasino le afioga Fepuleai Ameperosa Roma, e lē faia e ia le filifiliga, o le faaiuga lea e fitoitonu ma le lesitala o le faamasinoga.
Poo ai lava le loia o le a tulai mo ia e tatau ona ia talia, ma le tuualalo a le faamasino ia Malele, ia faaaoga tatau le avanoa ua ia maua.
Ua faatonuina lē ua molia e toe tulai i le aso 12 o le masina nei o Iuni ma e tatau ona oo atu ai ma le loia ua totogi e le Malo, mo le faatulagaina o le isi laasaga o se folasaga e fua iai se faasalaga mo Malele Atofu Paulo.
