O le atinae o faatoaga, galuega tetele e pei o malaevaalele ma uafu, atinae o tagata tafafao ma le vaega o aoaoga, ua vaevae iai le asiasiga i Savaii a usugafono o le fono o le Atoa o Samoa lea ua tuua le motu o Upolu mo Savaii i le aso lona lua lenei o le fonotaga a taitai ma pulega o faigamalo a Amerika Samoa ma Samoa Tutoatasi.
O atinae o galuega tetele o le a asia ua aofia ai le uafu i Salelologa, ma vaalele i Maota ma Asau, afi eletise e maua i le suavai o loo i le afioaga o Vailoa Palauli, ma le alalaupapa sima fou i Samalaeulu o loo sopoia ai le vaitafe o le maliolio.
O maota gasegase i Tuasivi ma Safotu, le nofoaga o le iunivesite aoao a Samoa i Salelologa, ma le nofoaga o loo gaosia ai le siapo o le a asia foi e usugafono, faapea le faatoaga i Lata, o le faatoaga a Saina, le nofoaga e fasi ma tapena ai aano o manufasi le Gidlow Meat Process ma le Savaii Koko.
O lea asiasiga ua faatino ina ua mae’a ona tatala i le faletalimalo o le Taumeasina le fono lona 4 o le Atoa o Samoa lea sa tomua i le sauniga lotu na taitai ai le faafeagaiga o le Ekalesia Faapotopotoga Kerisiano Samoa i Moataa ma saunoaga mai taitai o faigamalo a Samoa e lua.
O le mae’a o saunoaga mai le Kovana o Amerika Samoa ma le Palemia o le Malo o Samoa Tutoatasi, na toe afea ai mataupu sa soalaupule i le fono lona tolu sa usuia i Amerika Samoa ia Iulai o le tausaga nei.
Faaalia e le Tamaitai Palemia, Afioga Fiame Naomi Mata’afa ina ua mae’a ona tatala le fonotaga i se talanoaga ma lenei auaunaga, o mataupu e pei o pemita ulufale e tatau ona iloa se taotoga tonu pe a mae’a le fono o loo talimalo ai nei lo tatou Malo.
Ua faamoemoe o se taimi o le a maua ai se pepa o faamatalaga faalauaitele e faamautu ai ni iugafono o le a autasi iai le fono lona 4 o le Atoa o Samoa.
