O le ogatotonu o lenei vaiaso le Aso Lulu le aso 22 o Fepuari ua faagasolo ai le palota muamua poo le pre-polling mo le itumalo o Vaimauga 3 ma e tolu nofoaga poo falepalota o le a faatino ai.

O maota o Ekalesia Faapotopotoga Kerisiano Samoa i afioaga o Faatoia, Tanugamanono ma Vailima o le a agai iai mo le faia o palota muamua, ma e na o tagata palota o lea itumalo ua talia a latou talosaga mo le faia muamua o a latou palota ona o mafuaaga o loo aiaia i le Tulafono o faigapalota e agai i nofoaga ua atofaina.

O le fale palota faapitoa i Salelologa i Savaii le fale Samoa o le Matagaluega o Tina ma Tamaitai, atina’e o afioaga ma agafesootai, faapea falepalota faasavali poo mobile booths i le nofoaga o tamā ma tina matutua i Mapufagalele ma le falemai o Tupua Tamasese Meaole i Upolu e faatoa faaaoga i le palota laititi a Vaimauga 3 i le Aso Faraile nei 24 o Fepuari, faatasi ai ma falepalota e 13 i totonu o le itumalo e pei ona mae’a ona faalauiloa lautele e le Ofisa o le Komisi o Faigapalota.