Ua faasolo suesuega a le Immigration i faiga o loo omai ai tagata faigaluega mai atunuu i fafo ma le tala e omai faigaluega lelei, ae o lea e oo mai iinei e fai o le lē lelei o mea e nonofo ai ae leai ni galuega.

Lipotia e le Newshub le asiasiga i se tasi o fale 3 potumoe i Papakura i Saute o Aukilani na maua ai le tusa ma le 40 o alii na omai i lalo o visa faigaluega, peitai ua tolu masina e leai ni galuega.

O le toatele o i latou nei o tagata Initia ma o lea na totogi le faitau afe o tupe e faagaioi ai talosaga o visa faigaluega ma le polomisi, e omai i Niu Sila e maua ai galuega ma totogi lelei.

E tolu aso e leai se meaai ma o lea na valaau ai loa e i latou nei leoleo.

O le malumalu lea na tua iai i nisi o taimi, e o iai e maua ai se meaai ma ua faaupuina ai e nisi ua pei i latou o tagata aisi.

Fai mai le Immigration o se faanoanoaga le alia’e mai o lipoti faapenei, ma e foliga mai ai ua faaleaogaina e pulega o loo latou faakonekarateina le system.

A o faasolo suesuega a le Immigration, o le tala ua aumai i tagata nei na omai ma le faamoemoe e oo mai iinei galulue, ae leai, aua le nofoa’i ae valaau atu ma faailoa atu.