E tolu ni auala poo options ua ave faafautuaga e le Komisi Suesue o faigapalota i le Palemene, e faia iai se latou faaiuga mo le filifilia o faipule tamaitai, e mafua mai i feteenaiga na oo i le faamasinoga i le mae’a o le palota tele o le 2021 ona o le faauigaina ma le faamatalaina o le vaega 44 o le tulafono faavae e faasino i le 10 pasene mo nofoa o tamaitai, lea sa finau mai isi e tatau ona lima ae fai mai isi e ono.
Ua fai mai le fautuaga muamua a le Komisi Suesue ia faaaogā le fuainumera ma’oti e ono e pei ona iai nei e tusa o le faaiuga a le faamasinoga o talosaga apili poo le faamasinoga o talosaga toe iloilo, mo le faatinoga o le 10 pasene.
Ae ia faaaogā ma le metotia fou e faigofie ai ona pale se faipule tamaitai mai itumalo e laiti le faitau aofai o tagata palota.
O lea faiga fou e faalagolago ai le filifilia o se tamaitai i le tele o palota a le sui sa manumalo.
O lona uiga e tatau ona faaopoopo faatasi palota a le sui manumalo ma le sui tamaitai e maua ai le pasene e faatusatusa ma isi sui tauva tamaitai o isi itumalo.
O se auala lenei e manaomia ai le toe teuteu o le Vaega 44 o le faavae o loo aiaia ai le 10 pasene.
O le auala lona lua, Ia faamamalu faaletulafono le filifilia o sui tauva tamaitai e vaega faaupufai i se fua pe tasi i le toafā alii e avea ma sui tauva ona tatau lea ona iai ma se sui tauva tamaitai.
O le auala mo le filifiliga lona tolu ua fautuaina foi e le Komisi Suesue e faamautu nofoa faapitoa e ono o faipule tamaitai i totonu o le Palemene i soo se paea’iga.
O ia tamaitai e tofia faasui faipule tamaitai o itulagi ae lē o sui o itumalo.
O le faatinoga e lua palota e faia e tasi mo le sui tauva o le itumalo palota tasi mo le sui tamaitai o le itulagi.
O lea fautuaga o le a mafai ai ona vaevae sui ia e toaono i le toalua o sui faipule tamaitai mo Savaii ae fā i le motu o Upolu.
O lona uiga e palota uma itumalo o Salafai mo latou sui e toalua e faapena foi ona palota itumalo uma o Upolu mo sui tamaitai e toafā.
O le toalua o sui o Savaii ae fa mo Upolu o se vaevaega sa silasila ai le Komisi Suesue i le eseesega o le faitauaofai o tagata palota o loo faamautu i Savaii faapea ma tagata palota o loo nonofo i Upolu.
E lē o toe pogisa le atunuu i futia na aliali mai i le palota tele o le 2021 ma le finauga na oo i le faamasinoga i le faauigaina o le vaega 44 o le tulafono faavae faasino i le 10 pasene o nofoa o sui faipule tamaitai ma le femoumoua’i o fuainumera sa’o e faasino iai le 10 pasene, e fua i le aofaiga o nofoa e 51 o itumalo faapalota.
Na faamauina muamua e toalima ae oo ane ina ua maua lea numera i le faaiuga o lea faigāpalota, ae toe faaopoopo le isi sui tamaitai e toaono ai, ma taunuu ai loa finauga a vaega faaupufai autu e lua i le faamasinoga.
O le faaopoopo foi o lea sui ma maua ai le toaono o faipule tamaitai na tutusa ai numera o nofoa e tai 26 na umia e vaega faaupufai e lua le pati e puipuia aiātatau a tagata ma le Faatuatua i le Atua Samoa ua Tasi.
Peitai na taunuu le faamasinoga maualuga i le faaiuga e lima tamaitai, ae o le mae’a o le toe suesueina e le faamasinoga o le talosaga apili o le lu’i a le vaega e puipuia aiātatau a tagata na sau ai le faaiuga ua toaono, ae ua iai ma le isi faipule tamaitai e toafitu ai, ona o le isi faipule tamaitai na manumalo i le palota tele ae na faamavae ona o se tuutuuga poo se maliega a itu auai o se tagi tau palota poo se election petition mai le itumalo o Falealupo.
Na toe lu’i foi le nofoa lona fitu lea o tamaitai ma aveesea ai e le faamasinoga o talosaga apili ona e solo faavae ma ua mautu ai nei i le ono nofoa o tamaitai i le aiaiga o le 10 pasene.
