Ua tolopo taotoga na faamoemoe e faia i le falemai i Dunedin ona o le utiuti o le aufaigaluega ma le pisi tele o le Emergency Department poo le ED.
O le tala mai lea anapo mai le falemai ma ua faatoese ai i gasegase na aafia ona o lenei suiga.
O loo ta’ua ai foi e le falemai ua pisi tele le Emergency Department i le toatele o gasegase e sulu atu ae ua toagaogao le aufaigaluega e le gata o nisi o loo mamai ae o le tele foi o avanoa faigaluega o loo faasalalau.
E ui la i le pisi tele ae le faapea o teena ai e le Emergency Department gasegase e sulu atu ma o loo faasolo lava foi le vaaiga o tagata e oo atu i le tigaina o le gasegase.
I se faamatalaga mai le falemai i Dunedin, e le na o latou le falemai o loo pisi ae faapea foi le tele o falemai i soo se vaega o Niu Sila.
E lei manino mai i le suiga ua faailoa mai e le pulega o le falemai a Dunedin poo afea lea ua toe tolopo iai taotoga o gasegase ua suia nei.
