Tolopo le Faamasinoga o le Tamaitai Palemia seia tapena lana loia

Tusia – Maina Vai

Ua tolopo le fa’amasinoga o le Tamaitai Palemia o Samoa Afioga Fiame Naomi Mataafa i le aso 13 ma le aso 14 o le masina o Tesema, sei tuuina atu le avanoa e tapena ai le alii loia o loo tulai mo ia.

O le mataupu na valaauina i le Faamasinoga Faaitumalo i Mulinuu i le taeao analeila, ma le fuafuaga e fofoga ai mau pe faamaonia le moliaga o le faia o faiga faasolitulafono i le taimi a’o lumana’i ai le Faigapalota ia Aperila o le tausaga nei.

E toatoalu molimau mai le itu a le o loo tagi i lea mataupu le Susuga ia Elikapo Peni, sa fuafua e valaau analeila. E iai fo’i molimau mai le itu a le o loo molia peitai e lei faailoa mai e lana loia mai Niu Sila ia Kieran Raftery QC.

O le tolopo ai o lenei mataupu e mafua ona e lei tapena le alii loia e pei ona ia talosaga mai ai i le Faamasinoga i le Aso Faraile o le vaiaso ua mavae atu. E ala lea i lona fesootai mai i le o loo ia tulai ai le Tamaitai Palemia i luga o le initaneti e fua iai ana tapenaga.

O loo fuafua i lona avanoa ai mai isi mataupu e pei ona tuuina atu ia te ia e tulai ai lea sa ia manatu ai o le Aso Gafua o le vaiaso na tuanai sa fuafua e avanoa ai mo la la talanoaga ma le o loo molia,(obtain instructions from his client) peitai na te lei iloaina o le Aso Gafua lea o le aso malolo i Samoa.

Na ia faaalia fo’i sa ia taumafai mai i le Aso Lua peitai e lei avanoa le o loo molia ona o nisi o mataupu mo le tapena atu i le Palota laititi o loo loma nei, ae sa toe fesootai atu le o loo molia i le Aso Lulu e leo avanoa foi ia.

E le’o teena e le alii loia o loo tulai mo le ua tagi i lenei mataupu ia Aumua Ming Leung Wai le talosaga mai a le Raftery e tolo le mataupu. Na pau le tulaga sa tulai mai o le faagaulemalie o le Tamaitai Faamasino ia Alalatoa Rosella Papalii i le umi ona tuua mai o lenei mataupu. Sa ia faailoa ai, ua maea tapena le faamasinoga e fofoga mau i le aso, peitai ua le tasi se taimi ua tolopo ai ona o le talosaga a le alii loia mai Niu Sila.

Sa ia faapea mai fo’i o lea sa ia tuuina atu le faaaliga i le imeli e faamanatu ai i loia a itu uma e lua le faamasinoga i le aso, e le gata i lea sa manino lana faaaliga, sa tuuina atu i nisi o mataupu laiti (preliminary issues) ao lumanai ai le iloiloga a le faamasinoga i le mataupu lea ina ia faila mai i le Aso Lua o le vaiaso ua tuanai atu.

Sa ia faailoa o le mataupu lenei na amata mai lava i le aso 14 o Me o le tausaga nei, ma faatulaga ai le fofogaina o mau i le aso 6 o Setema,2021 ma tolo ai i le faaaliga, o lea o le a tulai le alii loia mai Niu Sila mo le Afioga i le Tamaita’i Palemia, ma faatulaga mai ai i le aso, a’o lenei fo’i ua toe talosaga mai e tolo.

Na faailoa e Papalii a tuu atu i le taimi sa tuuina atu i le alii loia e sauni ai ma fesootai mai i le o loo tulai ai ua silia i le masina. O se taimi e manatu le faamasinoga ua lava mo lana tapenaga, ae le taugofie fo’i i le o loo tulai lona totogi e tulai ai mo ia.

“It is not cheap engaging you to apper for this matter”

Sa faailoa foi e le Tamaitai faamasino i le alii loia o Raftery, o le moliaga o loo molia ai le o loo ia tulai ai ua leo se tulaga faigofie lea mo le o loo molia, atoa ai la ma le talosaga faafia mai e tolopo poo a fo’i mataupu tau polokiki o loo pisapisao ai nei le atunuu e le aia ia tulaga i le faatulagaga a le Faamasinoga.

“Did you realise Mr Raftery while you are not ready to proceed with this matter… this charge is hovering on your client’s head for quite some time, and she is entitle to have the hearing of this matter as soon as possible..and you are asking for another adjournment to whatever time is covienent to you or to whatever political…that is going on in this country…it has nothing to do with the court”

Na faailoa e Papalii faatoa ia maua le talosaga ina ua oo mai i le faamasinoga i le taeao analeila. Na faailoa mai fo’i e le alii loia mai Niu Sila talu ai ona o isi mataupu o loo iai lona aafiaga sa mafua ai lea tulaga, e le gata i mataupu i Niu Sila ae o loo iai foi isi mataupu i Samoa nei e pei o taeao ma le vaiaso fou.

Na faailoa e Aumua Ming Leung Wai talu ai le ogaoga o le moliaga o loo molia ai le Tamaita’i Palemia ma le tulaga o loo finau mai ai lana loia ia tolopo, na te faatauaina ai le tulaga o le mataupu ia ‘fair’ ia mafai ona fesootai le o loo molia i lana loia…”It is all ina a matter of a fair trial” ae sa ia talosagaina le tolopoina mulimuli lenei o le mataupu.

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required