Ua sau le faatonuga mai le failautusi o le matagaluega o aoga e faaauau pea ona malolo aoga mo lenei vaiaso sei faatoa a’e i le Aso Lua o le vaiaso fou.
A o tumau pea lapataiga o timuga mamafa atoa ai ma le tele o auala toe faaleleia ona o lologa i Aukilani, na muai sau ai ma le talosaga a le National Emergency Management Agency ia tuuitiitia taavale e feoai a o faia galuega toe faaleleia.
Na sau ai loa ma le faaiuga a le failautusi i le afiafi ananafi mo aoga uma e aofia ai ma aoga amata faapea ma iunivesite i totonu o Aukilani, sau mai Wellsford seia paia Pukekohe, o le a tapunia pea aoga mo le vaiaso atoa lenei.
O loo tuu mai foi le avanoa e mafai ai ona faia aoga online, peitai ua māua e tala fou o le toatele o aoga e le o faia foi ni aoga online.
O se faasilasilaga na tuai ona sau i tua, ma e iai nisi o pulega e lei fiafia iai ona ua uma ona tapena uma mo le a’e o fanau i le aso faapea nisi o aoga na fuafua mo a taeao.
Na mulimuli toe faatoese le matagaluega o aoga i aoga ona o le auala na sau ai le faasilasilaga, lea e lei logoina sa’o pulega o aoga, ae na faatoa iloa i tala a ofisa faasalalau.
Mai le pulega, na mafua lea i le faaletonu o masini tau tekonolosi a le matagaluega na le mafai ai ona lafo ni imeli ma o loo suesueina nei.
