E toavalu se aumalaga o fomai mai Saina o le a galulue i le auaunaga a le soifua maloloina i le atunuu ma o le vaega lona valu foi lea ua malaga mai i lalo o fesoasoani a lea Malo mo le siitia o le auaunaga a le matagaluega o le soifua maloloina.
O fomai nei ua aofia ai i latou e iai poto faapitoa i nisi o auaunaga faafomai i le faia o taotoga, faapea le tomai faafomai o le neurosurgeon ma fomai o ponaivi.
Sa masani ona tasi le tausaga e galulue ai fomai mai Saina i lo tatou atunuu, ae o le vaega muamua lea o fomai mai lea atunuu o le a faaopoopo le isi tausaga e galulue ai.
O le tausaga nei ua atoa iai le 60 tausaga o le polokalame fesoasoani a Saina mo Samoa i le auaunaga tau soifua maloloina.
Na faafeiloai lea vaega o fomai Saina i le Aso Lulu o le vaiaso nei e sui o le pulega o le matagaluega ma tauaao ai ma le fesoasoani a lea Malo o totoga ma mea faigaluega mo le faia o toggafitiga faapea vailaau faafomai.
Ua faafetaia e le pulega o le matagaluega o le soifua maloloina le faaauau pea o le lagolago ma le fesoasoani a Saina i le faaleleia o le tautua mo le ola ma le soifua maloloina lelei o o tatou tagata.
