Ua fai e Egelani le miti a le Toa Samoa i le taaloga tala malae o le Ipu o le lalolagi i le Lakapi liki, i le 60 ‘ai o Egelani i le ono a Samoa. O lea ua amata ai ona togafiti manu’anu’a o le Toa Samoa ma tulimatai lana taaloga o sosoo ai nei i le Ipu o le lalolagi o loo faagasolo i Peretania.
Ua faaalia e le faiaoga o le tatou aulakapi Liki o Mat Parish i se lipoti, na te teena manatu e faapea sa solomuli le Toa Samoa, i le ‘afa mulimuli ina ua le mafai ona tali atu i le malosi o Egelani.
Ua faailoa foi e le faiaoga o le Toa Samoa, o loo tumau pea le lelei o tapenaga ae ua le laki le taaloga muamua. E toatolu tama o le tatou ‘au ua faamanu’alia ma e le o mautinoa pe toe avanoa i latou i taaloga o loo totoe.
O Tyrone May, Branden Hamlin Uele, ma Hamiso Tabuai Fidow na manunu’a i le taaloga muamua a le tatou Toa Samoa. E ui ina malolo Samoa ia Egelani ae ua faaalia e le kapeteni o Junior Paulo, o le ‘au a le atunuu na filifilia o se ‘au lelei ma malosi, ma e leai se ‘alofaga i le faaiuga na taunuu iai le taaloga.
Faaalia foi e le kapeteni o le a toe timata le upega ma vaavaai toto’a i masaesae ina ia toe fonofono ma su’i ia maumau lelei.
