O se alii talavou faatoa 19 tausaga o lona matua o le uluai tagata lea ua faasala i le falepuipui ina ua toe amatalia galuega a le faamasinoga maualuga mo lenei tausaga fou.
E tasi le tausaga ma masina e 4 ua nofosala ai Eteuati Toelei’u Gisi mai le nuu o Salelologa, ina ua faamaonia lona ioeina o le moliaga o le taumafai e faaoo le maliu i se tamaititi 11 tausaga le matua, ma le moliaga o le faaoolima matagā i se tamaitai 22 tausaga le matua.
Na faailoa e ona mātua i le faamasinoga o le la atalii ua faasalaina e iai ni aafiaga o lona mafaufau e mafua ai ona ia faia ni amioga faapea.
Peitai na faia suesuega a le fomai o le mafaufau ma iloa ai, e le aafia lona mafaufau i se gasegase ae o se tagata e vave le ita ma e le mafai foi ona ia pulea lea tulaga pe a oo ina tagofia le avamalosi.
O le mae’a ona ia inuina ni fagupia Taula malosi poo le Taula Strong, na ia faatino ai solitulafono na molia ai.
Ua ave le fautuaga a le faamasinoga i le pulega o le falepuipui ina ia ave Eteuati i le a’oga o le pulea o le ita.
