O galuega faaauau a le laulau o le komiti faafoe o le asosi o tusitala ma le aufaasalalau a Samoa mo le isi 12 masina e amata ia Ianuari o le tausaga fou 2026, ua filifilia ai nisi o tamalii e toalua i le laulau, e sui tulaga i ni sui e to’alua o le Komiti Faafoe ua faamavae.
O le fono faaletausaga a le asosi i le Aso Faraile ua mavae na tofia ai le tofa Maulolo Ueligitone Malifa ma le afioga Lepailetai Tosimae’a Tupua e atoa iai le to’afitu o sui o le Komiti Faafoe o loo ta’ita’i ai le tama’ita’i Pelesetene o Lagi Keresoma.
O le fono faaletausaga na talanoa ma pasia ai tala o le tupe ma le lipoti a le su’etusi faapea le lipoti a le Pelesetene.
O le tausaga fou lea ua taatia iai le faailogaina o le 50 tausaga talu ona faavae le asosi.
O le masina o Me o loo fuafua e faatino ai lea faamoemoe.
