Ua tofia nei e le Lakapi Samoa le tofa Matamua Upati Junior Salima e avea ma faia’oga ulu mo le ‘aulakapi ta’ito’afitu a le atunuu le Manu Samoa 7s.

O le itulau o faamatalaga a le Lakapi Samoa i luga o le facebook o loo aumai ai lenei faasilasilaga, ma ua sauni atu ai nei le alii faia’oga ulu e tapena le Manu Samoa 7s mo le taamilosaga a le Oceania 7s lea e faagasolo i le masina fou, Tesema 2024.

Sa faamautū mai e le Ofisa Sili o le Lakapi Samoa, Faleomavaega Vincent Fepuleai lea tofiga, i le mae’a ai o le faiga filifiliga a le Komiti Faatonu mai ia i latou sa faatalosaga i lenei avanoa ina ua faasalalau, o i latou ua agavaa i lenei tofiga mai totonu lava o Samoa faapea nisi na faatalosaga mai isi atunuu.

Na saunoa Faleomavaega e faamanuia i le tofa Matamua mo lona tofiga fou, ma faaleo foi moomooga o le Lakapi Samoa ina ia mafai e le faia’oga fou ona toe faatula’i mai le ‘au a le atunuu i se tulaga maualuga aemaise ina ia mafai ona agavaa ma saofagā atu i le Challenger Series 2025.

O loo faailoa i lenei faasilasilaga, o le tofiga o le faia’oga ulu o Matamua o loo faasino atonu atu i le tapenaina o le Manu Samoa 7s mo le Oceania 7s; a mae’a lena taamilosaga ona toe iloilo ai lea e le Komiti Faatonu a le Lakapi Samoa le tulaga sa iai le ‘au mai lea taamilosaga, ma faamautinoa ai le itulagi e aga’i iai le lumanai o le National Sevens Program.

O loo faailoa foi le agaga faafetai o le tofa Matamua i le avanoa ua faaee atu ai e le Lakapi Samoa lenei tofiga ia te ia na te ta’ita’ia ai le Manu Samoa 7s ma faaauau ai pea lana tautua mo le atunuu, ma o le a taumafai foi i le mafai e gata ai lona silafia, ina ia tula’i mai le ‘au i se tulaga manuia i le taamilosaga o le a tapena atu iai, ina ia mafai ona agavaa mo le taamilosaga a le World Sevens Challenger Series i le 2025.

O le tofa Matamua, o se alii faiaoga i kolisi ma ua ia ausia foi le tulaga o le World Rugby Accredited Level 3 Coach.

Sa avea o le Faia’oga Ulu mo le ‘aulakapi a le Tama Samoa 7s (Under 18) ma le ‘au a le Tama Uli 7s.

O taimi a o avea Matamua ma faia’oga o le Tama Uli, lea na iloga ai le tula’i mai o lea ‘au e manumaloina taamilosaga a le ta’ito’afitu i totonu o le atunuu, e pei ona manumalo i le su’egāsiamupini a le Vodafone Samoa National Sevens Series mo tausaga sosoo e tolu, mai le 2017 e oo i le 2019.

O le tofa foi ia Matamua na faia’ogaina le ‘au a le Tama Uli lea sa manumalo i tauvaga autū ta’itasi i totonu o le motu tele mai le 2014 to 2024, lea e pei foi ona latou toe manumalo ai talu ai nei i le Vodafone Iva Savaii 7s.

O ausiaga na sili ona mata’ina ai lona tomai tau faia’oga o ‘aulakapi, e pei ona manumalo ai lana ‘au i le Marist Samoa International Sevens i le 2022, o le 60th Vodafone Samoa Independence International 7s i le 2022, o le Auckland Samoa International 7s i le 2022, ma le Auckland Marist Samoa International Sevens i le 2023.

O le tausaga e 2022, na ta’ita’ia ai e Matamua le ‘au a le Tama Uli i se tulaga matuā mata’ina ina ua manumalo sosoo lana ‘au i taaloga e 34, ma e faaono ona manumalo sosoo lana ‘au i le Ipu o na sa’iliga siamupini.

Talu ai nei, sa ia ta’ita’ia ai foi le ‘au Under-18 a le Kolisi o Vaiola ma manumalo ai i le National Schools Sevens Championship i le tausaga lenei, 2024.

Sa avea foi Matamua o se Development Officer mo le Lakapi Samoa, ma sa telē lona sao na faatino ai i le lalaga mai ma iloa ai le tele o taleni ma agavaa o loo iai i fanau a le atunuu aemaise lava foi i fanau mai le motu tele i Salafai, lea foi na iai lava nisi na filifilia ai e fai ma sui o Samoa i taaloga lakapi faavaomalo.

O le tofa Matamua e mai afioaga o Salelologa, Tapueleele, Vaiola ma Falealupo; ma o se tamā tausi aiga.