Ua toe vaaia le maua o suka enaena i fata faatau o faleoloa supamaketi ma faleoloa laiti i le atunuu ina ua taunuu le vaaoloa ma le uta o le suka enaena sa faaitiitia lona tulaga maua i ni nai vaiaso ua tuanai.

O le tuai mai o vaa na faaitiitia ma le maua ai lea oloa manaomia tele i lo tatou atunuu.

O ni vaiaso foi i le masina ua mavae sa molimauina le faaitiitia o le maua o le oloa o le sikaleti i le mafuaaga lava e tasi, ua tuai mai vaa ma oloa e gaosi ai le tapaa.

O lea foi ua toe sologa lelei le maua o lea oloa i le taimi nei. O le tasi o oloa sa faaitiitia foi lona maua o le aniani ae o le tuai foi o vaa oloa na mafua ai.

O lea ua toe faateleina i le atunuu le aniani fai meaai. E iai foi taimi e faaitiitia ai le oloa tau taumafa o le vaemoa ae o le mafuaaga lava e tasi o le tuai o vaa.

Ua fautuaina e le matagaluega o alamanuia pisinisi ma leipa le au fai faleoloa i le atunuu, e le talafeagai lo latou sii maualuga o le tau o ni oloa pe a oo ina faaitiitia ma o se solitulafono.

O le toatele o tagata faatau ua latou molimauina lea tulaga ma ua fautuaina ai e lea matagaluega ina ia tapa lisiti o le tau o ni oloa ua mautinoa ua sii maualuga tau, ona avatu lea i le ofisa o loo gafa ma le mataituina o le tau o oloa mo a latou suesuega.