Ua iai le suiga i le piriota na muai fai mai le faigamalo tuufaatasi o le a aumai ai nisi leoleo fou e 500 poo i latou nei o loo i le frontline.

O le maliega na muai faailoa mai e lē i lalo mai o le 500 leoleo fou e aumai i totonu o le lua tausaga muamua, peitai i le fesiligia o le minisita o leoleo, Mark Mitchell ananafi i totonu o le Palemene na fai mai ai o le a faaopoopo le 500 leoleo i totonu o le nofoaiga lenei, o lona uiga o le tolu tausaga.

Ua upuia ai e le sui o le Labour le malo i le toe sui o ana polomisi ma faapea mai ua toe solomuli le malo.

Peitai o loo teena e le minisita o leoleo a mea ua solomuli le faigamalo, ma ia ta’ua o loo fua uma i luga o fautuaga na tuuina atu ia te ia a o seei mai i le tofiga minisita o lea o loo iai faafitauli i le faiga o loo sailia ai nisi leoleo faaopoopo e faafaigaluega ma o se tasi o luitau tele o le malosi o le sau a Ausetalia lea o loo omai e sailia atu iinei nisi a latou leoleo fou.

A o faaauau ai pea la finauga i totonu o le Palemene i le va o le malo ma le itu agai, mai le peresetene o le asosi o leoleo Chris Cahill, o le fofo lava o le faafitauli ma o le faamua foi lea o le fai ia lelei totogi o leoleo.