I lipoti o le Ipu o le Lalolagi a tamaitai i le soka, ua faaalia le maofa o nisi o tagata iloga a Niu Sila i le taaloga i le tulaga ua iai nei lea faagatama pe a toe tepa i lona amataga mai e foliga sa na o se taaloga sa fiafia iai tamaitai talavou.
O le faatalanoaga a le Seven Sharp ma se tasi o totino muamua na iai a Niu Sila i le soka o Barbara Cox na ia faailoa ai o lana uluai taaloga na taalo ai i le soka i le 1973 a o 26 ona tausaga ma talu mai lea taimi ua tamau ai lona fiafia i le taaloga.
Na faamatala e Barbara na oo le mataupu i le komisi o aiātatau ina ua le mafai ona faataga tamaitai e taaalo faatasi ma alii ma o le 1984 na faatoa mafai ai ona faataga lea tulaga ae sa faigata tele ona ofi ane tamaitai i le taaloga.
O le toe tomānatu la i ia taimi o luitau ma faigata ma faatusatusa mai i le tulaga ua iai nei lea ua toeitiiti sold out pe faatauina uma pepa matamata o taaloga i malae taalo uma mo le Ipu o le Lalolagi 2023 o se tulaga e ao ona mitamita ai i latou uma na iai lo latou sao i le atina’eina mai o le taaloga.
