O le mae’a tuli o le faasalaga 5 tausaga o Stuart Webber ona o solitulafono o le umia o le pauta faasāina le aisa, ma laau faasāina o le maruana ma magalo i le tausaga e 2021, o le masina nei o Fepuari ua toe ulufale ai lea tamā 51 tausaga le matua o Vailoa Faleata ma Lotopa, i le falepuipui i Tanumalala.

O le isi ona faasalaga fou e 16 masina ina ua ioe i le umia o le aisa, laau faasāina, ma paipa i le faamoemoe e faaaoga i se gaioiga solitulafono e fesootai i nakoti (narcotics) poo pauta ma laau faasāina.

O le masina o Iuni o le tausaga na tea nei 2022, na tuuina atu ai e leoleo se tusi faataga mai le faamasinoga i lē ua nofosala mo le sueina o lana taavale i se nofoaga e fufulu ai taavale i Lotopa.

O lea sailiga na maua ai e leoleo se ato taga uliuli o loo iai le aisa poo le methamphetamine e tusa lona mamafa ma le 5.14 kalama. Na maua ai foi ma lau maruana ma sikaleti maruana e tolu.

Na maua ai foi i le taavale a Stuart Webber ma se paipa tiota, ma se tinoitupe e $8,875.40 sene. Na magalo i le masina o Fepuari o le tausaga e 2021 ina ua mae’a tuli lona faasalaga 5 tausaga, ae toe maua ia Iuni o le tausaga na tea nei o ia toe umia pauta ma laau faasāina.

O Fepuari o le tausaga nei ua toe foi ai Stuart Webber i Tanumalala, tusa ma le tausaga talu ona maea le isi faasalaga, ae ua toe tuli le isi faasalaga i le falepuipui mo le umi e 16 masina poo le tasi le tausaga ma masina e 4.