O le amataga o le fonotaga a le Palemene i le asō na amata ai galuega a le Maota i le faasilasilaga a le Fofoga Fetalai i le faalauiloa mai o le toe tofiaina e le Vaega Faaupufai o loo tulai mai i le malo , o le Afioga i le Tamaaiga, poo le Tama Tauaana  le Ao o le Malo o loo iai nei, ina ia toe faaauauina o lona tofi mo le isi lima tausaga. 

Ona valaau lea o le palota a faipule uma o le Palemene ma lagonaina ai le ioeina uma e faipule o lenei tofiga tāua. 

Na sosoo ai ma le lauga a le afioga i le Tamaitai Palemia, Fiame Naomi Mataafa e faalautele atili ai le faasilasilaga o le tofiga o le Ao o le Malo. 

Sa faamamafa e le Palemia agavaa sa tofiaina ai lenei tofi o le Ao o le Malo, ma toe faatepa le Palemene i le faiga sa amata mai ai lenei tofi. 

O le a toe iai se aotelega o lenei lipoti mulimuli ane.