Ua toe filifilia nei le tamaitai ia Heseti Sione Vaai e fai ma Pule Sili o le Faalapotopotoga o Inisiua tau Soifua a Samoa poo le Samoa Life Assurance Corporation.
Ta’ua i pepa o faamatalaga o le a faapea ona faaauau le tofiga a le susuga ia Heseti mo le isi 3 tausaga.
Sa faapea ona faalauiloa le toe tofia o le tamaitai o Heseti i fonotaga masani a le Kapeneta.
Ua silia ma le 30 tausaga le auaunaga a le susuga i le Pule Sili i le malo.
Na amata lona olaga galue i le Ofisa o le Su’etusi Sili a le Malo (Audit Office) mo le 6 tausaga, ona sosoo ai lea ma le Pulega o le Suavai mo le 23 tausaga, a o lei tofia ma filifilia o ia e avea ma Pule Sili o le Faalapotopotoga o Inisiua tau Soifua a Samoa (SLAC).
Sa aoaoina i le Kolisi o Samoa, o le Iunivesite Aoao o Samoa (N.U.S.) ma o loo ia umiaina faailoga taualoa o le Bachelor of Arts; Majoring in Accounting & Financial Management & Minor in Economics mai le Iunivesite a le Pasefika i Saute i Fiti, faapea foi ma le Tipiloma i mataupu tau Pisinisi (Diploma in Business) mai le Iunivesite o Fesootaiga a Aukilani i Niu Sila.
