Na faailoa mai e le Komesina o leoleo ia Auapaau Logoitino Filipo le toe tetea ai i tua o le toatele o le pasese o le pasi a le Tuisamau Transportation lea na lavea i Fagaloa i le aso ananafi.
Na ta’ua e Auapaau e toatoatolu le pasese o loo taofia pea i le Falemai o Tupua Tamasese Meaole i Motootua ona e fai si tuga o manuaga.
E toatasi o loo taofia ai i le ICU poo le potu tigaina ae toalua o loo iai i isi potu e iai gasegase e le tigaina tele.
E silia i le 30 le pasese a le pasi na tauaveina, ma o le foi atu ai mai le taulaga o Apia lea e lavea ai ua latalata i Sauano.
O loo ta’ua i le faamatalaga a le alii avepasi e faapea o taofi le mafuaaga ua tupu ai le faalavelave ona ua faaletonu, peitai na saunoa mai Auapaau, o loo faatali leoleo seia malosi mai le alii avepasi ona toe suesue lea e leoleo faamaoniga o lana faamatalaga.
E tusa ai ma faamatalaga a nisi molimau sa iai i le taimi o le faalavelave ua le mafai ona faatonutonu e le avepasi le pasi ma ta ai loa i itu o le mauga ma mafuli ai.
O auala nei o Fagaloa o loo molimauina le vaiti tele mo feoaiga ma ua leva ona tagi mai nisi o faipule ua tuanai e fia faia e aofia ai ma le talosaga a le faipule o loo iai nei ia Mau’u Siaosi Puepuemai ina ia faia auala o lona itumalo.
Sa fesiligia le alii Komesina e tusa ai ma le itu tau pasiga taavale pe afai e maua o taofi na mafua ai le faalavelave ma ia ta’ua ai o le pasiga o taavale, ma le mautinoa e lelei ma malosi pasi nei mo felauaiga ua toe palasi atu i aao o le LTA.
E lua faalavelave tau taavale na molimauina i le faaiuga o le vaiaso, o le isi taavale na lavea latalata i le Apia Park i le taeao ananafi ma na faailoa e le alii Komesina o Leoleo e leai se isi ua ma’umau le soifua i ia faalavelave e lua.
