Ua tatala i tua i le taeao analeila le avepasi o le pasi lea sa lavea i le Hunter Valley ma maliliu ai tagata e toa 10.

O le suafa o lea avepasi o Brett Andrew Button 58 tausaga ma sa tulai i se taimi puupuu i le faamasinoga faaitumalo i Cessnock.

Ua ta’ua foi e leoleo ua faaleaogaina le laisene o Button ma ua iai foi nisi sā ua tuuina i lona laisene.

I le finauina o le tatalaina i tua o le avepasi na ta’ua ai e lana loia o lana client e iai tulaga tau le soifua maloloina o loo soifua ma ia.

O le molimu a le sui komesina o leoleo i le mataupu lea ua ta’ua ai o loo feta’ua’ina ua vave tele le alu ane a le pasi i le roundabout ma mafua ai ona taavalevale.

E 11 moliaga o loo feagai ma le avepasi, 10 moliaga i le avetaavale matautia ma le tasi o le avetaavale faatamala.

O anapo na aveese mai ai le pasi mai le vaega na lavea ai a o faaauau ai pea suesuega a leoleo.

Poo le ‘afa o le 11 i le po o le Aso Sa na tea nei na agai atu ai lea pasi i le itu i Saute o Wine Country Drive, ma sa feaveai ai malo valaaulia o se faaipoipoga na faia, 37 le pasese na iai i luga mai le 20 tausaga i le 60 tausaga le matutua o le pasese e pei ona faailoa e leoleo. 

Na mafuli le pasi i lona itu ma maliliu ai lava tagata e toaiva i lea nofoaga ae o le isi toatasi faatoa maliu i le falemai mulimuli ane.

E to’a 25 na aveina i le falemai mo togafitiga i manu’aga ma o loo iai pea lava i le taimi nei.

O Aokuso lea ua fuafua e toe tulai ai le avepasi i luma o le faamasinoga.