Ua faatonuina e le faamasinoga loia a itu auai o le mataupu tau faamasinoga i le su a Savalenoa Mareva Betham Annandale sa avea ma Loia Sili a le Malo, o le aso 27 o le masina fou o Fepuari e toe valaau ai, ma o le tologa mulimuli lea o le mataupu e tatau ona faamautu uma ai tapenaga a loia, aemaise o loia mo le Loia Sili ma le afioga i le tamaitai Palemia o loo molia e le itu talosaga.
O faamatalaga tauto poo affidavit a le itu o loo faasaga iai le tagi o le a faailoa ai mau e teena ai le su a lē sa avea ma Loia Sili a le Malo.
Ua talia ai e le faamasinoga le talosaga a loia a le itu o loo molia e tuu atu se tolu vaiaso e faamae’a ai lea tapenaga, ona o loo toesea ma le atunuu le tamaitai Palemia le afioga Fiame Naomi Mataafa.
O le valaauga mulimuli o lenei mataupu i le aso 27 o le masina fou e faamautu ai ma aso o le a tagofia ai i se tulaga aoao tetele lenei mataupu, lea o loo finauina ai e le Itu tagi se taui ma le maua o ona faamanuiaga tau totogi, mai le taimi na faamuta ai lona tauaveina o le tofiga Loia Sili a le Malo.
