E le po pea se nuu, e iai taimi e toe suluia ai i ave o le malamalama ma toe mafuta faatasi matai ma o latou auaiga pe a tuanai se vaitaimi sa fefulituaa’i ai ma va le fogavaa.
O le sefulufa o aso o le masina amata o lenei tausaga fou 2023 ua faamauina i talafaasolopito o le afioaga o Solosolo i le afio o le Taofia a Malietoa Taulapapa, afio le aloalii, Tupolesava, Usoalii tāua ma ē na au i Ao tainane Saleutogipo’e o le limamatua o tofiga o faleupolu, na toe faatasia ai nei le afioaga i le tuanai o se vaitaimi pe 3 tausaga o vaeluaina pulega a alii ma faipule, e mafua i mataupu o le lotoifale o le afioaga.
O le lotu faafetai na tomua ai le polokalame o le Aso Toonai na tea nei na auai uma faafeagaiga o ekalesia kerisiano i totonu o Solosolo, sosoo ai ma le ‘ava o le feiloaiga ae taualuga i saunoaga ma fetalaiga o le aso ua pine faamau ai le toe fuifui faatasi o lupe sa vao eseese.
O se tasi o iuleo na faalogoina i lea aso, o ai lava e toe faatupuina se to’a e toe va ai le fogavaa o le a moli talosaga le aiga o le au Sa Levi, e talosia lena tagata.
O le leleiga ma le lotu faafetai ua sami ai taumafaiga ia toe tasi le faiganuu a Solosolo i lalo o le faamalu o le fealofani ma le galulue faatasi, o le a avea ma sauniga faamanatu i tausaga uma.
O le sui faipule o le itumalo o le Anoamaa 2 e aofia ai ma Solosolo le tofa Lauofo Nuafesili Pierre Lauofo Meredith, na auai i le faamoemoe o le afioaga faapea nisi o paia ma mamalu maualuluga sa auai i le faamoemoe.
O se fatu pese talavou o le atunuu mai le afioaga o Solosolo le susuga Mr Tee ma se tasi o ana fatuga o loo saafi ai i le matagofie o le afioaga i ona pitonuu.
