Ua toe taliu manuia i fanua le siiga gasegase a le afioga i le Minisita le tofa Leatinuu Wayne Sooialo, ina ua faaiuina ma le manuia togafitiga a fomai i Niu Sila, ma ua toe faafoisia lona malosi i lona soifua maloloina.

Ua faailoa e le afioga i le Sui Palemia le toe taliu mai i Samoa o le Minisita o le matagaluega o leipa, alamanuia ma pisinisi i se finagalo tusitusia o le afioga Tuala Tevaga Iosefo Ponifasio i le faaiuga o le vaiaso na tea nei.

Ua faailoa ai foi e le Sui Palemia ma nisi o faaiuga ua mae’a ona faia e le Kapeneta e pei o le 5 miliona tala faaopoopo i vaegatupe o loo tuuina atu e le Malo mo siiga gasegase i fafo mo nisi e aafia i ma’i o le tino, ae le mafai ona togafitia i Samoa.

O lea lima miliona tala ua siitia ai i le 16 miliona tala tupe ua faamatuu atu mo lea polokalame i le tausaga faaletupe o loo faagasolo. 

Ua faailoa foi e le Sui Palemia le mae’a faamaonia e le Kapeneta o nisi o tofiga o faauluuluga o matagaluega ma faalapotopotoga a le Malo, e pei ona filifilia se uluai tamaitai e avea ma Tausi Mavaega a Samoa poo le Public Trustee lea ua tofia iai le tamaitai loia le afioga Tuitoga Christina Angela Teo Faitele.

Ua sui tulaga o ia i se tamalii sa avea ma Tausi Mavaega mo le 18 tausaga le afioga Leaupepe Peleseuma Mata’utia Ropati.

Ua tofia foi se faauluuluga fou o le Faalapotopotoga o Fale poo le Housing Corporation lea ua seei mai ai se tasi o tamalii ua leva tausaga o galue i lea faalapotopotoga tuma’oti a le Malo ma sa ia tauaveina le tulaga o le ofisa sili lagolago o le afioga Sautiamaivasa Titimaea Tiotio.

Ua sui tulaga o ia i le uluai tamaitai na tofia e faauluulu iai lea faalapotopotoga mo ni tausaga e tele le afioga Mata’utia Rula Levi.