Ua toe tuu tuu atu i tua e le faigamalo tausaga e agavaa ai nisi o taavale mo le auina atu i Samoa mai aiga i atunuu mamao.
O se tala fiafia lea mo nai aiga o loo fia ave ni taavale sa faaaogā, mo le tautuaina o aiga i Samoa, ituaiga o taavale e pei o loli, pickups ma 4WD.
Mo le taimi nei, e 10 tausaga i tua atu talu ona faaaogā se taavale i atunuu i fafo, e mafai ai ona auina atu i Samoa, ma o loo tumau pea lena umi mo taavale masani e ave mo nisi pisinisi masanı, peitai o le suiga ua iai, e tusa ma se faamautinoaga mai le alii Minisita o le matagaluega e fitoitonu i ai lea vaega, ua suia i le 20 tausaga i tua atu o se taavale e agavaa ai ona ave mo le faatinoga o atina’e o faatoaga ma faigafaiva, aemaise lava ina ia ogatusa ma le lagolagoina o le fuafuaga a le malo i poloketi o le miliona tala e pei ona faagasolo nei.
Mo se faataitaiga, o le taimi nei o le tausaga e 2013 o loo muta mai ai le tausaga o ni taavale e mafai ona ave i Samoa, peitai mo le suiga fou lea ua toe aapa ai le malo e tuu atu i tua i le isi sefulu tausaga, lona uiga ua agavaa ai taavale e pei o loli ma pikiapu mai le 2003 e mafai ona ave i Samoa.
Na saunoa foi le afioga i le alii minisita, le tofa ia Olo Afoa Fiti Vaai, o se isi suiga o le a faatino faatasi ma tausaga o taavale, o le vaega o le tiute. O loli tetele ua faaaogā ae fia ave i Samoa mo galuega o atina’e o le a leai ni tiute e toe totogia o na ituaiga o loli, se’i vagana ai tau e totogi i le auina au i vaa, o le vaega lena e lē pulea e le malo, e pa’ū lava i le kamupani vaa.
Ua toe faataga foi ona auina atu i Samoa pikiapu ma loli e foeuli agavale, o taavale tonu e aogā mo le feoa’iga a o tatou tagata i uta i le galuea’ina o a latou faatoaga, talu ai e toatele foi fanau o loo agai e galulue i le StarKist i Amerika Samoa, ma mafai ai ona maua mai ni a latou taavale faapena mo latou aiga.
Ma o nei suiga o lea ua amata faagasolo, ae moomia lava ona faafesootai lelei ofisa i Samoa ina ia toe manino atili ai i nei suiga a le malo.
