Ole taaloga faaiu I fanua a le Chiefs mo le taamilosaga o le tausaga nei e fetaui ai ma le Melbourne Rebels ua see mai nei e faia I Sini Ausetalia ona o le toe faaauau o le tapu I Melepone mo le koviti 19.

O le taaloga sa fuafua e faia I le aso Sa nei I Hamilton peitai o lea o le a faia I le Leichart Oval I Sini ile ta o le 5 I le afiafi o le aso Sa taimi niusila.

O le taaloga sa fuafua e talimalo ai le Chiefs I le FMG Stadium I Waikato. O le malae lea o le a faia ai le taaloga na taaalo ai foi le Highlanders ma le Rebels I le aso Sa talu ai ma o le malae autu o le West Tigers.

O loo iai pea le Chiefs I Ausetalia I le taimi nei ae na malolo I le Queensland Reds ile vaiaso talu ai I Townsville.

Fai mai le ofisa sili o le Chiefs Michael Collins ua le fiafia ua le mafai ona o latou talimalo ile Rebels aemaise ose avanoa foi e taaalo ai I fanua peitai e ao foi ona faamasani I le tulaga ua iai le koviti ma ona uiga.

O le taaloga mulimuli a le Chiefs ile taamilosaga e fetaui ai ma le Waratahs I le Brookvale Oval ile aso 12 o le masina nei.