O le faaiuga o lenei vaiaso i le Aso Faraile o le a faia ai toe sauniga o le susuga i le Toeaina o le sui Taitaifono o le Ekalesia Faapotopotoga Kerisiano Samoa le susuga Iosefa Atapana Uilelea, i lana ekalesia i Lotofaga ma lagomau ai.
O le Aso Tofi o le vaiaso nei ua fuafua e momoli atu lona tino maliu i lana aulotu sa galulue ai ma le faletua ia Tekimatang ma tofa ai mo leoleoga ae lumanai ai le Aso Faraile mo ona sauniga faaiu.
O le Aso Sa na toai taunuu ai lona Sa i Samoa mai Niu Sila ma afea ai le Malumalu o le Iupeli i Malua mo se sauniga lotu, ona faaauau lea o le momoliina o lona Sa i le maota maliu o Ligaliga.
O le talaaga o lona soifua galue e pei ona faailoa i upega tafailagi a le Ekalesia Aoao o loo ta’ua ai na ulufale le susuga Iosefa ma lona faletua i le Kolisi Faafaifeau i Malua i le tausaga e 1985 ae faaiuina a’oa’oga i le tausaga e 1988.
O le tausaga na sosoo ai le 1989 na osi feagaiga ai ma le aulotu EFKS i Lotofaga ma e tuumalo nei le sui Taitaifono ua 33 tausaga o le la galuega i le aulotu sa tuuoti ai le feagaiga.
Na avea ma Faifeau Toeaina o le Pulega a Lepa ma Lotofaga ma avea ai foi ma Toeaina Faatonu o le Matagaluega a Lepa, Lotofaga ma Aleipata i le tausaga e 2014.
Na tofia e avea ma Failautusi o le Komiti a le Autoeaina i le tausaga e 2017, ae na uluai filifilia i le Laulau o le Fonotele i le tausaga e 2019, ma tofia ai e na te tauave le tofiga Taitaifono aoao mai le tausaga e 2021 i le 2022.
E valaau lona matai o loo ia tauave le tofi sui taitaifono, ae o le taitaifono faaolioli mo le tausaga 2023 i le 2024.
O le susuga Iosefa Atapana Uilelea o le faafeagaiga taulagi a le afioga i le Sa’ofaapito le afioga Fiame Naomi Mataafa, o le uluai Palemia tamaitai o le Malo Tutoatasi o Samoa.
