Fai mai le kapeteni o le Crusaders, Scott Barrett o le a ia matuai vaai toto’a i le taitaiga o le All Blacks pe afai ae ofoina atu lea tulaga ia te ia.
Ua toe saini nei Scott Barrett i le Crusaders ma le Lakapi Niu Sila mo le isi lua tausaga, o lona uiga e oo atu i le faaiuga o le 2025.
O sana faatalanoaga ma le autusitala na faia mai i Fiti i le vaiaso nei ua ia ta’ua ai afai ae ia mauaina pe ofo atu le avanoa e kapeteni ai i le ‘au a le atunuu o le a ia matuai mafaufau totoa iai.
O le kapeteni o loo iai nei o le ‘au Sam Cane e le taumate o le a ia taitaia lava le All Blacks i le Ipu o le lalolagi i le tausaga nei ia Setema peitai afai ae agai ese i le mae’a o lea faamoemoe e ono maua ai se avanoa o Barrett i lea tofiga e pei ona agiga i lipoti.
Ua tolu ai nei tausaga o avea pea Barrett ma kapeteni o le Crusaders ma manumalo ai i Super Rugby titles mo ia tausaga.
O loo sauni nei Barrett ma le Crusaders e taaalo ma le Fijan Drua i le faaiuga o le vaiaso nei e atoa foi iai ma le 100 o ana taaloga mo le Crusaders.
