E 700 selau afe tala le fesoasoani a le Malo o Iapani na fausia ai le hall poo se maota fou mo le Kolisi o le Vaimauga, faaopoopo iai ma le 180 afe tala o le sao o le Kolisi ma le Itumalo, faaopoopo iai ma le 80 afe o le sailiga tupe muamua.
Peitai o le televave ma le saoasaoa tele o le sii o le tau o oloa i Samoa talu mai le masina o Me na amata ai le galuega, ua toe saili ai le Kolisi ma le asosi o matua ma faiaoga ma le komiti e saili mai ana tama fanau i fafo ma Samoa nei, se isi laveai tau tupe e faamae’a lelei ai le galuega a o lei umusa i le faaiuga o le masina nei.
Faaalia e le Peresetene o le komiti a le Kolisi o le Vaimauga le afioga i le Sa’o Faapito le afioga Leniu Vainiu Taito, o le leitiofoni saili tupe i le Aso Toonai nei, o se tapenaga ua faia ona ua utiuti le faasoa, maualuga le tau o oloa, ma ua le gafatia i seleni o loo totoe, aemaise o loo iai ni aitalafu talu ona faagasolo le galuega.
Se finagalo o le Peresetene o le Komiti a le Kolisi o le Vaimauga le afioga Leniu Vainiu Taito Galu.
