Ua toe saili se isi faauluuluga poo se Ofisa Sili o le pulega o fela’ua’iga i luga o le laueleele le Samoa Land Transport Authority, ona ua faamavae le faletua le afioga Galumalemana Leoititi Agnes Tutuvanu Schwalger, ona o fuafuaga tau i lona aiga.
O Fepuari o le tausaga e 2021 na toe filifilia ai lea tamaitai o le atunuu e tauaveina le tofiga Ofisa Sili mo lea auaunaga a le Malo mo le taimi lona lua o le konekarate 3 tausaga le umi.
O ia le uluai tamaitai na filifilia e avea ma faauluuluga o le pulega o fela’ua’iga i luga o le laueleele ma o ia ua lona lua i le soloa’iga o Ofisa Sili talu ona faatuina lea pulega a le Malo ia Tesema o le tausaga e 2008.
Ua 15 tausaga talu ona faatuina lea auaunaga a le Malo.
Ua iai foi nisi o faalapotopotoga ma Matagaluega a le Malo ua faasalalau e le komisi e pulea tagata faigaluega a le Malo avanoa ona ua lata ina mae’a konekarate.
O faauluuluga ia mo le auaunaga tau meli le Samoa Post Limited, o le pulega o le tineimu ma faalavelave faafuasei, faalapotopotoga o taui o faalavelave faafuasei, ma le faalapotopotoga o inisiua le Samoa Life Assurance Corporation.
