O le a toe saili se isi faauluuluga o le Pulega o Malaevaalele a le atunuu le Samoa Airport Authority, a o lei tuua e lē o loo tauaveina le tofiga le susuga Silimanai Ueta Banse Jr Solomona le galuega i le masina faaiu o lenei tausaga.
O le amataga o le tausaga fou o le a amata ai ona ia tauave le tofiga o le Pule o le vaega o le saogalemu o galuega tau vaalele a le Pasefika le Pacific Aviation Safety Office lea e ta’u faapuupuu o le PASO, ina ua filifilia o ia mo lea tofiga fou.
O le a faamautu o ia i le ofisa autu o lea auaunaga tau galuega o le saogalemu o vaalele i Port Villa le laumua o le atunuu o Vanuatu, ma e tolu tausaga le umi o lana konekarate.
Ua silia i le 30 tausaga o galue le susuga Silimanai Ueta i galuega o tomai tau vaalele e pei ona sa avea ma pailate e faatonutonuina le taunuu ma le oese o vaalele.
O Mati o le tausaga na tea nei na faamaonia ai e le Kapeneta le toe filifilia o lea tamalii o le atunuu e tauaveina le tulaga Pule Sili o le Pulega o Malaevaalele a Samoa.
