Ua i luma nei o le laulau a fono a le Palemene o loo faagasolo ana fonotaga i lenei masina fou o Mati, se tulafono taufaaofi ua faamoemoe le Malo e toe teuteu ai le tulafono autu o faigapalota.

O se tulafono taufaaofi e lē gata ina teuteu ai nisi o vaega o lea tulafono, ae o le a teuteu ai foi ma le aiaiga e faasino i le lesitala o tagata palota uma.

O le a tatala ai le faaaogāina o fesootaiga faatekonolosi e faia ai lesitala e lē gata mo tagata i Samoa ae o tagatanuu o Samoa o loo aumau ma alala i atunuu mamao.

Na faaalia e le Minisita o le ofisa o le komisi o faigapalota, Afioga Faualo Harry Schuster, e na o le tatala o le lesitala e faaaogā ai upega tafailagi, ae o isi aiaiga e tumau e pei o le susū atu o le tagata palota i le ofisa o le komisi o palota e faamaonia faamatalaga uma tau i lona tagata, o lona suafa matai, ma le nuu o loo lesitala ai.

O lona uiga o tagatanuu uma o Samoa o alala i fafo e manaomia le malaga i Samoa e faatino ai ia vaega, ae o le lesitala e mafai ona faatino i fesootaiga faatekonolosi.

O le faiga foi lea o le a suia ai ma le system e lesitala uma ai tagata palota, ae lē toe faaaogāina le system poo le faiga o loo iai nei, e pei ona faaalia e le Tamaitai Palemia, Afioga Fiame Naomi Mata’afa, ua tuai ma ua lē toe aogā.

O lona uiga e telē le galuega o le a faatino auā o tagata uma o loo lesitala i lola palota a itumalo faapalota e 51 e manaomia le toe pue o ata ma ave uma faamatalaga manaomia i le ofisa o faigapalota.

O se suiga foi pe afai e pasia le tulafono taufaaofi, o le a iloa tonu ai tagata e agavaa e palota i lea itumalo ma lea itumalo, ma foia ai le tasi o faaletonu ua leva tausaga o aafia ai a tatou faigapalota e saili ai tofi o le palemene, o le lesitala o tagata o isi itumalo e leai ni piitaga ma ni sootaga tau aiga i isi itumalo.

O se suiga ua faafetaia e le toatele o faipule auā o le a fufulu ai ma faamamā ia faiga lē manuia sa tutupu i tausaga ua tuanai, ona o le naunau e manumalo, ona avatu ai lea o tagata e leai ni piitaga ua lesitala i se itumalo.

O le itu sili ona leaga o lea faiga e pei ona sa molimauina i le faaiuga o nisi o palota ua tuanai, o le fai e tagata ese o le filifiliga o le sui faipule o se itumalo ae lē tau iai. 

O loo faagasolo le talanoaina o le tulafono taufaaofi i se tulaga faanatinati.

Ua faaalia e le Minisita e ana le tulafono taufaaofi, o loo lava le taimi e faatino ai lea galuega a o lumanai le isi palota tele a Samoa i le tausaga e 2026.

O loo atugalu le sui taitai o le Itu Agai, e lē lava le taimi, ma le isi ona atugaluga i le lē lava o le taimi, o le lesitala o tagata palota i faiga faatekonolosi.

O lana saunoaga i le Palemene, e na te lē talia lea suiga fou. 

O nisi finagalo sa faaalia e aofia ai le faipule mai Aleipata itupa i luga ia Fuaava Suluimalo Amataga, na ia faamamafa ai le taimi lea ua fuafua le 18 masina e faatino ai lea suiga, pe o lava le taimi mo le faatinoga ona e lē o se tulaga laitiiti le toe agai mai o le atunuu e toe tuuina faamaumauga o tagata palota uma i le system fou.

Aemaise ai le agai atu i tua o le ofisa ae ua omai tagata e faigaluega e lē faigofie le tulituliloaina.

Sa ia faamamafa foi le lesitala online e tāua ma aogā le system fou ae o le tuualalo ia muamua lesitala tagata o loo nonofo i Samoa ne’i palalū le system fou i le omai o tagata i fafo ae lei uma lava tagata o loo nonofo iinei.   

Sa faailoa foi e le sui faipule o Falelatai ma Samatau lona agaga fiafia ina ua mafai ona atiae e le IT a le atunuu le system fou lea, ae sa ia faailoa le tulaga ogaoga o faigapalota ma faatinoga online lea e mafai ai ona hack e tagata le system ma suia ai faaiuga o palota.

O le finagalo o le sui faipule e mafai e le malo lenei poo le HRPP foi ona totogi ni IT e hack le system ina ia suia faaiuga o le palota.

Sa ia aumai le faataitaiga i le palota a Amerika ma le mea o loo tupu mai ai.

Sa ta’ua e lagolagoina e lona sui le tulafono taufaaofi ma le suiga fou ona i lona manatu ia tafiesea tagata e lē o ni tagata o itumalo ae ua palota mo le sui faipule o itumalo.

Sa faapea mai le sui ua talatalanoa ai sui faipule o lona uiga e uma ane le tulafono fou lenei ua lē toe foi mai isi faipule i le Palemene ae i lona manatu ia faia i le amiotonu pe lē toe foi lona sui ae afai o fai ai le amiotonu o le tulaga sili lea.