Ua faamautu nei le toe amatalia o malaga aga’i mai i Samoa a le kamupani vaalele o le Virgin Australia i le masina o Mati o le tausaga fou 2023.

Ua faailoa lea fuafuaga e le Pulega o Tagata Tafafao mai i Samoa, lea ua fuafua ai lea kamupani vaalele e lima ana malaga i le vaiaso, e lua mai Brisbane ae tolu mai le aai tele o Sini.

Ua faailoa foi malaga faaopoopo i le vaiaso a isi kamupani vaalele e tolu le Qantas Australia, Air New Zealand ma le Fiji Airways. O le kamupani vaalele a Fiti ua 4 ana malaga e aga’i mai i lo tatou atunuu i le vaiaso, ma ua faaopoopo i lana malaga i Aso Faraile ta’itasi le afea o Samoa ma faaauau atu ai i Hawaii.

O se alavaa e mafai ai ona malaga ai pasese e fia afea lea setete o Amerika ma faaauau atu ai i le Malo tele pe a fia afea Los Angeles poo isi foi setete o le Malo o Meleke.

O le Aso Faraile na te’a nei na amata ai le malaga lea mai Nandi, afea Samoa ma aga’i atu ai i Honolulu i Hawaii. O le masina o Oketopa e faaopoopo ai le isi malaga mai Nandi e maua ai le lima o malaga a le Fiji Airways e aga’i mai lava i Samoa i le vaiaso.

O le Air New Zealand o le masina foi o Oketopa o le a faaopoopo ai le isi malaga ma maua ai le lima malaga i le vaiaso, ma o le a faaaogā ai ona vaalele o le Airbus 321 ma le vaalele lapo’a 787. O le Qantas o le a faaopoopo foi ana malaga e amata atu i le masina o Novema, ae mo le taimi nei e le’i faamautuina aso ma taimi e faia ai.

O se tasi lenei o laasaga i le faaopoopo o malaga a kamupani vaalele e fā ua tautuaina nei malaga mo Samoa, ua iai le talitonuga o le a siitia ai ma avanoa e maua e pasese e fia afea Samoa talu ona toe tatala tuaoi mo malaga masani i le amataga o le masina nei o Aokuso, aemaise ai foi o avanoa e afea ai lo tatou atunuu e tagata tafafao poo tulisi mai fafo.ir