E ui e lei mafai ona taunuu le malaga a Chris Hipkins ananafi na faamoemoe mo Wairoa, ae o lea na maua ai le avanoa o nisi o tagata faifaatoaga o Hawke’s Bay.

O le faalua ai lea ona le taunuu o malaga a le Palemia mo Wairoa, o le vaiaso talu ai ona o le louloua o le tau ae o ananafi ua faaletonu le helikopa a le ami.

Na suia ai loa agai i Puketapu ma feiloai ai ma tagata faifaatoaga kiwifruit ma apu ma e lei iai se taamilo na o faamatalaga tuusasao lea na iai i lea feiloaiga.

O se tasi o faifaatoaga Ratahi Cross e pei ona toe ta’ua e le Newshub e silia ma le $30 miliona le gau ua iai nei lana faatoaga, ma o le faigata e leai ni inisiua e mafai ona tapa.

Na uma lea ae faaauau atu le Palemia i Hastings, ma o le lagona lava e tasi o le moomia o se fesoasoani vave.

I nei feiloaiga ua faailoa ai e tagata mafatia e le o lava le $25 miliona ua faamatuu mai e le malo mo faifaatoaga ma le au failafumanu.