Ua tauaofia i le vaiaso nei le faamasinoga o talosaga toe iloilo poo le faamasinoga apili a le faamasinoga sili a le atunuu, lea na amata i le Aso Gafua i le toe iloiloina o le faaiuga a le faamasinoga maualuga, i le mataupu o le uili a lē sa avea ma Faamasino Sili, lea o loo talosaga ai lona faletua le afioga Iliganoa Daphne Sapolu e ala i lana loia.

O le faaiuga ua taoto na teena ai le lu’i faaletulafono a Iliganoa sa ia fesiligia ai le sa’o o le vaevaega o le uili.

O nisi o mataupu o loo toe tagofia e lea faamasinoga, o le faaiuga a le faamasinoga maualuga na faamaonia moliaga o le umia o nakoti o le ‘aisa ma ni aupega o laau malosi ma ututau, sa molia ai Daryl Mapu o se tasi sa umia se tulaga sinia i le ofisa o faigapalota.

O loo toe iloilo ai foi le faaiuga na teena ai le talosaga a lē sa avea ma Pelesetene o Faamasinoga o Fanua ma Suafa ua lu’i ai le faaiuga na lē talia ai lana talosaga mo se poloaiga e taofia ai le faamuta o lona avea ma Pelesetene. 

E ese mai mataupu o loo toe suesueina faaiuga e le Faamasinoga Apili a le faamasinoga maualuga, e lua aso ua faatulaga e suesueina ai e le faamasinoga sili le su a lē sa avea ma Pule Sili lagolago o le Iunivesite aoao a Samoa, le afioga Maugaoalii Ufagalilo Faamanū Mualia.

O loo molia i lea mataupu le pulega o le Iunivesite ona o le solia o aiaiga faaletulafono na faamuta ai le konekarate a lē ua faauluina le talosaga poo le tagi.

O le Aso Lua ma le Aso Lulu o le vaiaso nei o le a suesueina ai molimau ma folasaga a loia a itu auai o lea mataupu tau faamasinoga.