Talu ona tai lua masina ma aumai e le Matagaluega o Tupe a le Malo tau fou o oloa o le suauu ma penisini, o le tuanai o le masina o Aokuso lea sa maualuga ai tau o ia oloa, o lea ua savalia le aso lona valu o le masina lona iva ua toe foi i le aumai o tau fou o ia oloa i le masina.
O lona uiga ua toe foi i le tulaga masani sa iai o le faailoa o tau fou i le amataga o masina taitasi, ae le o le lua masina. E le o faailoaina e le matagaluega o tupe le mafuaaga o le toe faia o lea fesuiaiga, ae talu ona tai lua masina ma aumai tau fou, sa molimauina le maualuga ai o siitaga o tau o suauu ma penisini talu mai Aperila o le tausaga nei.
O lea ua vaaia le pa’ū teisi o le tau o le lita o ia oloa manaomia e pei o le penisini, ua 3 tala 74 sene i le lita, faatusatusa i le tau sa iai e 4 tala 36 sene i le lita. O le suauu kiso ua 4 tala 9 sene i le lita, ae o lona tau sa iai sa 4 tala 69 sene i le lita. O le kalasini o lona tau sa iai sa 4 tala 24 sene i le lita, o lea ua 3 tala 68 sene i le lita.
Ua faaalia e le tamaitai Minisita o Tupe o le pa’ū o le paelo suauu ua mafua ai ona maua le laveai mo tau o nei oloa mo Setema, ae o loo tumau pea le mafuaaga autu o le siitia o tau o nei oloa, i le sii taua o Rusia i le Malo o Ukraine.
