O se vaaiga e lē masani i le aso Gafua o lenei vaiaso i Samoa i le gaogao o le taulaga ina ua taofia le agai o fanau i a’oga, ma tagata i galuega masani ona o le mafui’e e 6 tesimale 9 lona malosi na lulu ile taimi tonu o loo tapena aoga a le fanau ma galuega o le amataga o le vaiaso fou.

E toatele sa lē mautonu ona e fai si umi o lulu le mafui’e pe a ma le 2 minute, ae na atili popole ma atuatuvale ina ua taotao tua mai ai lapataiga e nofo sauniuni mo se sunami poo se galu lolo. O le tele o matagaluega ma faalapotopotoga a le Malo sa taofia auaunaga masani, e faapena foi i nisi o pisinisi laiti, seia vagana faletupe o faleoloa tetele supamaketi ma isi auaunaga tumaoti sa faaauau pea a latou tautua masani.

O su’ega a le fanau ua tolopo uma mai ile aso Lua o lenei vaiaso e faaauau ai, ma le faamoemoe o le a faagasolo ai seia oo ina ma’ea. E leai ni ola ma ni soifua na aafia ile mafui’e e leai foi ni meatotino na faaleagaina.

O le te’a laititi o le afa o le valu o le taeao o le aso Gafua na lūlū ai le mafui’e o lona malosi e 6 tesimale 9, ae o le ta o le iva ile taeao na alu ai le faasalalauga a le ofisa o le tau i fautuaga o le sunami, sosoo ai ma le ave o le fautuaga e nofo sauniuni.

O le toe 15 ile 10 ile taeao lava o le aso Gafua na toe faaleaoga ai ia fautuaga. Faaalia e le taitaifono o le Komiti o Faalavelave faafuasei le tofa Agafili Tomaimano Shem Leo, e faatoa tata logo ma faalogoina leo o sailini pe a lapataia le atunuu ile iai ose sunami, ma o le faailo lea e tatau ai ona tuua loa e tagata laoa ma maota, o fale faigaluega ma soo se nofoaga tu lata ile sami ae agai i nofoaga maualuluga e saogalemu.

O le mafuie malosi ua faamauina lona malosi ile 8 tesimale 1 na aafia ai Samoa ma nisi o motu tuaoi ile tausaga e 2009 ile masina o Setema. E 186 ola ma soifua na fano ai ile sunami na mafua mai i lena mafui’e malosi.