O le faaaloalo maualuga a le Malo o Samoa sa tapena mo le faiga malaga a le Palemia o Niu Sila ma sui o lona Malo, o le faatamalii i ona teuga masani e aofia ai le manufata tele, ma le ie o le Malo le iiini tosi ninii e lei faia iai teuga masani i lona ‘ula felanulanua’i.
O le faaupuga o le ie e pei ona folasia i le sauniga o le ‘ava faatali a le Malo o Samoa, ua mae’a ona lalaga ma ua matagofie i ona tulaga uma, ae o le sootaga faaleuo i le feagaiga i le va o atunuu e lua, o le a teu e Niu Sila le ie ma faitalia latou i ni teuga feilafi e saga matagofie ai.
O le uiga o lea aiaiga o le isi 60 tausaga pe a aulia o le a toe silasila ta’ita’i o Malo e lua i le ie ma ni foliga fou o le a iai, o se pine e faamauina ai le sootaga mafanafana ma faatumauina pea. O se tasi o aiaiga o le feagaiga, e poo ai lava o itu e lua ua mana’o e momotu le mafutaga faaleuo, e lē tuua.
Ua na o Samoa le atunuu ua faatino ai e le Malo o Niu Sila lea feagaiga talu mai le aso muamua o Aokuso o le tausaga e 1962 na sainia ai i Vailima le nofoaga sa faamautu ai le sui o lea Malo sa faamautu i lo tatou atunuu i tausaga o nofo kolone Samoa i pulega a Niu Sila.
