Ua faatumau pea ona tauave e le susuga Tuilaepa L Sailele Malielegaoi, le tofiga taitaifono o le pulega o le Lakapi Samoa poo le Iuni Lakapi a le atunuu sa iloa tele ai i le tele o tausaga.
O le mae’a o le fono faapitoa a le Fono Faatonu a le Lakapi Samoa i le Aso Tofi o le vaiaso nei, na toe filifilia ai lea tamalii na te faaauau pea i le tofiga taitaifono, o se tofiga sa ia umia talu mai tausaga e 23 sa avea ai ma Palemia o le atunuu.
O le toe tulai o le susuga Tuilaepa e tauave le tulaga taitaifono, ua ave ai lana faafetai ma le faamalo i le sao o faatonu e toatolu o le Komiti Faafoe, ua faasee tuagalu ua le toe filifilia. O i latou ia e aofia ai le faletua le afioga Lemalu Tuiloma Sina Retzlaff, le afioga Afamasaga Rico Tupa’i ma le tofa Fata Pito Malifa.
Ae i le fono faaletausaga a le lakapi Samoa i le aso 24 o Novema na filifilia ai Faatonu fou e toalua mo le komiti Faatonu e aofia ai le tofa Faleomavaega Titimaea Tafua mai le Iuni lakapi a Apia, ma le afioga Lea’ana Ronnie Posini, mai le Iuni a Safata.
O le faletua le afioga Faumuina Margret Godinet Crichton o se tasi o Faatonu filifilia fou mo le vaega o tupe, ma Matafeo George Latu mo le vaega o le commercial, ma e fa tausaga le umi o le a tauaveina ai ei laua ia tofiga.
I le finagalo o le taitaifono ua toe filifilia, e ala mai i se pepa o faamatalaga mai le Lakapi Samoa, ua faafetaia ai e le susuga Tuilaepa Faatonu o le komiti i le mau pea o le toovae i le faatuatuaga ua toe tuuina atu na te tauave ai le tofiga ma o lana tatalo ia faatumau pea ona galulue faatasi ma sui o le Komiti Faatonu mo le faaauauina o le atinae o le lakapi i lo tatou atunuu.
O se tasi o galuega tele o loo silasila mamao iai le taitaifono o le Lakapi Samoa o le faaauau o polokalame mo le siitia pea o le lelei o le taaloga, ma tapenaga mo le Ipu o le lalolagi i le tausaga fou 2023.
